5. สุปฏทายกตฺเถรอปทานํ

[31]

‘‘ทิวาวิหารา นิกฺขนฺโต, วิปสฺสี โลกนายโก;

ลหุํ สุปฏกํ [สุปฏิกํ (สฺยา.), ปูปปวํ (ปี.)] ทตฺวา, กปฺปํ สคฺคมฺหิ โมทหํฯ

[32]

‘‘เอกนวุติโต กปฺเป, สุปฏกมทาสหํ;

ทุคฺคติํ นาภิชานามิ, สุปฏสฺส อิทํ ผลํฯ

[33]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[34]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[35]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุปฏทายโก เถโร อิมา คาถาโย

อภาสิตฺถาติฯ

สุปฏทายกตฺเถรสฺสาปทานํ ปญฺจมํฯ

6. ทณฺฑทายกตฺเถรอปทานํ

[36]

‘‘กานนํ วนโมคยฺห, เวฬุํ เฉตฺวานหํ ตทา;

อาลมฺพณํ กริตฺวาน, สงฺฆสฺส อททิํ พหุํ [อหํ (สี. สฺยา. ปี.)]ฯ

[37]

‘‘เตน จิตฺตปฺปสาเทน, สุพฺพเต อภิวาทิย;

อาลมฺพทณฺฑํ ทตฺวาน, ปกฺกามิํ อุตฺตรามุโขฯ

[38]

‘‘จตุนฺนวุติโต กปฺเป, ยํ ทณฺฑมททิํ ตทา;

ทุคฺคติํ นาภิชานามิ, ทณฺฑทานสฺสิทํ ผลํฯ

[39]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[40]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[41]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ทณฺฑทายโก เถโร อิมา คาถาโย

อภาสิตฺถาติฯ

ทณฺฑทายกตฺเถรสฺสาปทานํ ฉฏฺฐํฯ

เตวีสติมํ ภาณวารํฯ